Sjokoladekaramellar

Eg har “baka” i dag, her er eitt av glasa:

karamell

Eg har kokt karamellar. Det er tidkrevande, men verdt strevet!

Oppskrifta eg nyttar fekk eg på news (“njus”) for lenge lenge sidan. For dei yngre: “News” er ei forkorting for “newsgroups” som var den einaste måten å utveksla meiningar på før nettforum, bloggar og facebook dukka opp.

Her eg oppskrifta Signe Kristin Djuve delte med njus-folka i november 2001:

Signes sjokoladekaramellar
1,5 dl fløte
100 g smør
150 g mørk sirup
250 g sukker
100 g kokesjokolade
(100 g smutta mandlar)

Bland fløte og smør i ein tjukkbotna kjele og varm til kokepunkt. Rør inn
sirup, sukker og små stykke sjokolade og la blandinga småkoke ved svak varme
og utan lokk. Når ei teskjei av massen kan formast til ei kule i kaldt vatn,
er karamellblandinga ferdig. Rør eventuelt inn mandlane og tøm blandinga i
ei GODT SMURT form(veeeeldig viktig!) La massen bli heilt kaldt før du tek han
ut av forma og deler den opp i passelege bitar med skarp kniv. I oppskriften
står det at ein skal pakke bitane inn i cellofan, men eg brukar små bitar
plastfolie. Det er ein avsindig jobb, men du vil vere glad for at du har
gjort det – til slutt!

Eg har funne ut at det funkar bra å tømme karamellmassen i ei eldfast form på bakepapir. Då lyfter du ut heile papiret før du deler opp karamellane. Pizza-skjærar er flott reiskap til dette.

Dette er ikkje noko du byrjar med viss du har det travelt. Det tek lang tid å koka karamellane, og det er ikkje gjort i ei handvending å pakka dei inn heller. Men når du er ferdig, har du herlege karamellar. Eg oppbevarer dei i kjøleskapet. Dei smakar best då.

Denne gongen laga eg dobbel porsjon. Det vart utruleg mykje, men eg trur det trengst …

  • Ingen postar liknar denne!

Tags: , , ,

3 Responses to “Sjokoladekaramellar”

  1. Signe Kristin Djuve Says:

    Sidan eg rota bort oppskriften min på desse karamellane for lenge sidan – noko som kan ha samanhang med at eg har flytta fire gonger sidan 2001, så var det passe finurleg at eg fann att oppskriften på denne måten!

    Verden er somme gonger merkverdig…

    :-)

  2. minica Says:

    Eg nyttar denne kvart år, eg, og det er ein slager i julekalenderen på jobb. :) Så når eg no har deg her; takk for ei knakande god oppskrift! Det er framleis noko av det beste eg har smakt! :)

  3. AB Says:

    D hørtes bra godt ut. Kanskje æ ska prøv mæ på d æ og.

Leave a Reply